Në orën 17:00 të kësaj të hëne deputetët do të mblidhen për të zhvilluar seancën plenare. Pas një jave ndërprerje në kuadër të “Javës së Gjelbër”, Kuvendi i Shqipërisë do të rikthehet këtë të hënë në aktivitetin e tij të zakonshëm me mbajtjen e seancës plenare.
Gjatë kësaj seance pritet që diskutimet të fokusohen në disa çështje me interes publik, të evidentuara nga vetë zgjedhësit. Në rendin e ditës janë përfshirë tema që lidhen me shqetësimet e qytetarëve, të cilat vetë deputetët i kanë evidentuar gjatë takimeve të zhvilluara me ta.
Gjithashtu, një tjetër çështje e rëndësishme e cila pritet të diskutohet është dhe përfundimi i regjistrimit të zgjedhësve nga diaspora si dhe problematikat që ata hasën gjatë këtij procesi.
Kujtojmë se më 4 mars, përfundoi zyrtarisht procesi i regjistrimit në platformën e Komisionit Qendror të Zgjedhjeve PER, një hap ky i rëndësishëm për garantimin e të drejtës së votës për shqiptarët që jetojnë jashtë vendit.
