Ditën e sotme deputetët do të zhvillojnë seancnë plenare të radhës, e cila pritet të shoqërohet me tensione për shkak të aksioni opozitar. Partia Demokratike pas dënimit të Ervin Salianjit ka vendosur të mos lejojë zhvillimin e asnjë seance normale.
E paralajmëroi dje kreu i Grupit Parlamentar të PD-së, Gazment Bardhi por pa dhënë më shumë detaje nga aksioni politik që do të ndërmarrin.
“Sa i takon seancës së nesërme grupi ka vendosur të bëjë gjithçka për të mos lejuar normalitet në seancën e nesërme (3 shtator)” tha Bardhi dje.
Ditën e djeshme Sekretariati i Etikës përjashtoi 24 deputetë të PD nga aktiviteti parlamanetar dhe komisionet hetimore, si masë ndëshkimore për djegien e karrigeve, kaosin dhe hedhjen e këmbës së karrigeve dhe sende të tjera drejt kryetares së Kuvendit dhe ministrave ditën e hënë, 30 shtator.
Ndëshkimin më të madh e kanë sekretari i Përgjithshëm i PD-së, Flamur Noka, e deputeti demokrat Bledion Nallbati me 60 ditë përjashtim nga punimet e Kuvendit. Dy muaj përjashtim ishte edhe për kryetarin e grupit të PD-së, Gazment Bardhi i cili qëlloi me këmbën e karriges në drejtim të kryetares së Kuvendit Elisa Spiropali.
Ndërsa për 20 deputetët e tjerë që ndihmuan skenarin e kaosit, duke tërhequr karriget në drejtim të oborrit të parlamentit, aty ku edhe iu vu flaka, u dha përjashtim 40 ditë.
Vetëm për Edi Palokën, në mesin e 24 të ndëshkuarve pati amnisti, pasi ky i fundit u përjashtua me 10 ditë kalendarike nga jeta parlamentare.
Menjëherë pas seancës së 30 shtatorit ndërkombëtarët kanë bërë apel për të mos përshkallëzohen tensionet dhe janë shprehur qartë se në një demokraci dhuna nuk ka vend.
Ndërkohë të gjitha këto zhvillime ndodhin në një moment kur Shqipëria më 15 tetor pret të çelë negociatat për grup kapitujt e parë , ata që quhen “Themeltare’ me BE-në./ilirianews
