Deputetët e zgjedhur në Kuvendin e Kosovës sot më 03.05.2025 do të mblidhen për të dhjetën herë në përpjekje për të konstituuar legjislaturën e re.
Vazhdimi i nëntë i seancës që nisi më 15 prill vjen pas ndërprerjes, si pasojë e dështimit për të ndërruar formën e votimit – nga i hapur në të fshehtë – për zgjedhjen e kryeparlamentarit.
Pozicionet e partive politike mbesin të pandryshuara edhe para vazhdimit të seancës së sotme
PDK dhe LDK, partia e dytë dhe ajo e treta për kah numri i deputetëve, akuzojnë të parën- LVV-në për shkelje të rregullave e procedurave në mungesë numrash.
“Nuk mund që me arbitraritet të theksuar një subjekt politik të provojë të instalojë diktat, e para të imponojë një kandidat që nuk merr besimin e deputetëve në Kuvendin e Kosovës, e dyta të shkel procedurat, një proces që ka filluar tash e sa kohë, që është votimi për të zgjedhur kryekuvendarin”, ka thënë të premtern më 02.05.2025, Blerta Deliu-Kodra, Deputete e PDK-së.
“Është abuzim me pozitën që i ka dhënë rregullorja e punës së kuvendit. Kjo sjellje është e papranueshme dhe në fund të fundit edhe denigrim edhe i personalitetit të individit. Por, edhe strategji abuzive që po e përdorë Lëvizja Vetëvendosje për të parandaluar ose për të bllokuar krijimin e institucioneve të reja të Republikës së Kosovës”, ka thënë Armend Zemaj, Deputet i LDK-së.
Partia që doli e para në zgjedhjet e 9 shkurtit 2025, Lëvizja Vetëvendosje ka propozuar disa herë rresht deputeten Albulena Haxhiu për kryetare të Kuvendit të Kosovës. Por, Haxhiu nuk mori më shumë se 57 vota duke mos u zgjedhur kryeparlamentare.
Në anën tjetër, partitë e tjera kanë paralajmëruar që emri Albulena Haxhiut nuk do të votohet.
Seancën për konstituimin e Kuvendit e drejton deputeti më i vjetër i Kuvendit të Kosovës, në këtë rast Avni Dehari nga Lëvizja Vetëvendosje.
Seanca e sotme vjen saktësisht 84 ditë pas zgjedhjeve parlamentare të 9 Shkurtit 2025./ Shkrimi u mor nga Kallxo.com.
