Në orën 10:00 të paradites së sotme, Kuvendi i Shqipërisë zhvillon seancën plenare për paraqitjen e programit të ri qeverisës të kabinetit Rama, në mandatin e tij të katërt. Seanca pritet të zgjasë mbi 24 orë, duke u cilësuar si një nga më të gjatat e këtij viti parlamentar.
Sipas vendimit të Konferencës së Kryetarëve, çdo deputet ka në dispozicion nga 10 minuta për diskutim, çka pritet të zgjasë ndjeshëm kohëzgjatjen e debatit. Pas paraqitjes së programit nga kryeministri Edi Rama, fjala i kalon opozitës. Në këtë fazë pritet të marrë fjalën Sali Berisha ose Gazment Bardhi, në varësi të vendimmarrjes së grupit.
Në përfundim të debatit, Kuvendi do të zhvillojë votëbesimin për qeverinë e re, duke miratuar dekretet e Presidentit Bajram Begaj për kryeministrin dhe 16 ministrat e kabinetit.
