E mërkura pritet të shënojë pikun e valës së të nxehtit afrikan që ka përfshirë territorin shqiptar, me temperatura që do të arrijnë deri në 41°C në disa zona të vendit.
Sipas shërbimeve meteorologjike, moti do të jetë kryesisht i kthjellët dhe me diell gjatë gjithë ditës. Vranësira të lehta pritet të shfaqen vetëm pasdite në zonat malore lindore. Temperaturat do të jenë të larta si në mëngjes ashtu edhe në mesditë. Vlera më e ulët parashikohet në Peshkopi me 12°C, ndërsa maksimumi prej 41°C do të regjistrohet në qarqet Elbasan, Shkodër dhe Berat, në zona të izoluara.
Era do të jetë mesatare, me intensitet që herë pas here do të kapë mbi 30 km/h nga drejtimi Perëndimor-Veriperëndimor, duke sjellë dallgëzim të lehtë në brigjet detare.
