Presidenti i Ukrainës, Volodymyr Zelensky, ka emëruar shefin e inteligjencës ushtarake, Kyrylo Budanov, si drejtuesin e ri të Zyrës Presidenciale, pak më shumë se një muaj pasi ndihmësi i tij i mëparshëm dha dorëheqjen mes një skandali korrupsioni.
“Në këtë moment, Ukraina ka nevojë për përqendrim më të madh në çështjet e sigurisë,” shkroi Zelensky në rrjetet sociale, duke publikuar edhe një foto nga takimi i tij me Budanovin në Kiev.
Budanov, 39 vjeç, ka drejtuar deri tani inteligjencën ushtarake ukrainase (HUR), e cila ka marrë përgjegjësinë për disa sulme shumë efektive kundër Rusisë.
Paraardhësi i tij, Andriy Yermak, kishte ndikim të madh politik gjatë gjithë pushtimit të plotë të Ukrainës nga Rusia, të nisur në vitin 2022. Ai drejtoi gjithashtu ekipin negociator të Ukrainës në bisedime kyçe me Shtetet e Bashkuara, që synonin përfundimin e luftës.
Në postimin e së premtes, Zelensky theksoi se Ukraina ka nevojë për një fokus më të madh në sigurinë kombëtare, zhvillimin e forcave mbrojtëse dhe të sigurisë, si dhe në procesin diplomatik të negociatave. Ai shtoi se Budanov ka përvojë të specializuar në këto fusha dhe kapacitetin për të sjellë rezultate konkrete.
Presidenti bëri të ditur se i ka kërkuar shefit të ri të Zyrës Presidenciale të përditësojë dhe paraqesë dokumentet kyçe që lidhen me “bazat strategjike” të mbrojtjes së Ukrainës.
Yermak, 54 vjeç, dha dorëheqjen më 28 nëntor, një zhvillim që u pa si goditje e fortë për Zelenskyn. Dorëheqja e tij erdhi pak pasi shtëpia e tij në Kiev u kontrollua nga agjencitë antikorrupsion të vendit.
Ai nuk akuzohet për ndonjë shkelje, ndërsa Byroja Kombëtare Antikorrupsion (NABU) dhe Prokuroria e Specializuar Antikorrupsion (SAPO) nuk dhanë shpjegime për arsyen e kontrollit.
Muajt e fundit, hetuesit kanë lidhur disa figura të njohura me një skandal të dyshuar për përvetësim rreth 100 milionë dollarë në sektorin e energjisë.
