Biznesmeni miliarder Behgjet Pacolli ka reaguar në emisionin “Opinion” pas akuzave për një marrëveshje të noterizuar që parashikon transferimin e 47% të aksioneve të Aeroportit të Vlorës në emër të Valon Ademit.
Sipas Ademit, ekziston një dokument i nënshkruar që vërteton këtë marrëveshje. Megjithatë, Pacolli e ka mohuar kategorikisht, duke deklaruar se ka firmosur disa letra pa e ditur përmbajtjen e tyre.
“Në korrik të vitit 2023 isha me pushime. Më mori Valon Lluka nga Prishtina dhe më kërkoi firmën për disa veprime bankare. Erdhi shoferi me një dosje, thava duart dhe firmosa, por nuk e pashë çfarë firmosa,” – deklaroi Pacolli.
Ai shtoi se vetëm dy vite më vonë kuptoi se dokumenti i nënshkruar kishte të bënte me një kontratë për transferimin e aksioneve, e cila parashikonte që transaksioni të ndodhte në prill 2025.
Pacolli pranoi gjithashtu se nuk është në dijeni të saktë për shumën e shpenzuar në ndërtimin e aeroportit dhe se me Valon Ademin kishin një marrëveshje gojore për ndarjen e aksioneve sipas investimeve të secilit, pas përfundimit të projektit.
Nga ana tjetër, Valon Ademi e ka akuzuar Pacollin për moszbatim të marrëveshjes dhe për përpjekje për ta përjashtuar nga projekti i Aeroportit të Vlorës.
Skandali ka marrë përmasa të gjera, ndërsa disa raportime ndërkombëtare kanë përmendur edhe mundësinë e përfshirjes së interesave të huaja në projekt.
Ndërkohë, opinioni publik mbetet i ndarë: si është e mundur që një biznesmen me përvojën dhe pasurinë e Pacollit të firmosë dokumente pa i lexuar?
