Autoritetet turke kanë arrestuar kreun e bashkisë së rrethit Bayrampaşa në Stamboll, Hasan Mutlu, së bashku me 47 zyrtarë të tjerë lokalë në një hetim për korrupsion që përfshin Partinë Popullore Republikane (CHP), partinë kryesore opozitare në vend. Sipas televizionit shtetëror TRT Haber, Mutlu akuzohet për ryshfet, shpërdorim detyre, mashtrim dhe manipulim të tenderëve publikë. Arrestimi i tij ndodhi pas një operacioni policor që përfshiu 72 lokacione në Stamboll, ku u sekuestruan dokumente dhe materiale të lidhura me rastin.
Në një reagim të tij në platformën X (ish-Twitter), Mutlu mohoi akuzat dhe i cilësoi ato si “sulme politike”. Ai theksoi se ka shërbyer vetëm për interesin e qytetarëve të tij dhe se situata është një rezultat i operacioneve politike dhe shpifjeve të pabaza. Ky arrestim është vetëm një në një mori të ngjashme, pasi më shumë se një duzinë kryebashkiakësh të CHP-së janë arrestuar muajt e fundit. Në këtë listë ndodhet edhe kryetari aktual i Bashkisë së Stambollit, Ekrem İmamoğlu, një rival i njohur politik i presidentit Recep Tayyip Erdoğan. İmamoğlu u arrestua në mars, një veprim që për shkak të protestave të mëdha mbarëkombëtare.
Tani ai përballet me një gjyq të rëndësishëm ku akuzohet për falsifikim të diplomës universiteti dhe prokuroria ka kërkuar një dënim deri në 8 vite e 9 muaj burg, si dhe ndalim të tij nga veprimtaria politike. Seanca e radhës do të zhvillohet në tetor. CHP e akuzon qeverinë për një fushatë të qëllimshme për të minuar opozitën dhe për të hapur rrugën rikandidimit të Erdoğan në vitin 2028 ose më herët në rast të zgjedhjeve të parakohshme. Nga ana tjetër, qeveria turke mohon këto akuza dhe pohon se gjyqësori është i pavarur.
Një tjetër zhvillim i rëndësishëm do të ndodhë të hënën, kur një gjykatë civile në Ankara do të shqyrtojë kërkesën për anulimin e kongresit të CHP-së të mbajtur në vitin 2023, një vendim që do të ketë pasoja për strukturën e partisë dhe stabilitetin e opozitës.
