Një tjetër skandal ka shpërthyer rreth Real Madridit, këtë herë nga prapaskenat. Në një intervistë për Marca, ish-nutricionistja e klubit, Itziar González (47 vjeç), ka zbuluar se gjatë kohës së saj te “Los Blancos” është përballur me paragjykime, presione dhe madje edhe kërcënime nga stafi mjekësor i klubit.
Sipas saj, pavarësisht rezultateve pozitive të punës – lojtarët kishin më pak ngërçe, më pak dhimbje muskulore dhe lodhje më të ulët pas stërvitjeve dhe ndeshjeve – stafi mjekësor nuk e pranonte rolin e saj dhe e shihte si të panevojshëm. Kjo armiqësi, sipas Itziar-it, çoi deri aty sa departamenti mjekësor e bindi edhe presidentin Florentino Pérez kundër saj, pavarësisht faktit se ajo ishte ftuar personalisht prej tij.
“Plani i ushqimit te Real Madridi? Në Real Madrid nuk ekziston fare një departament nutricioni. Mjeku përgjegjës më tha se dieta dhe suplementet nuk kanë asnjë lidhje me dëmtimet dhe performancën. Kuzhinieri gatuan çfarë të dojë dhe kaq. Më thanë se puna ime ishte e pavlefshme,” rrëfeu Itziar.
Situata u përkeqësua më tej, kur ajo pretendon se u përball me kërcënime direkte, duke i thënë se do t’ia shkatërronin jetën dhe se do ta poshtëronin për aq kohë sa të ishte e mundur. E gjendur nën presion të vazhdueshëm, Itziar dha dorëheqjen, por madje edhe këtë iu desh ta fitonte në gjykatë.
Tani, me gjithçka pas krahëve, ish-nutricionistja ka vendosur të flasë hapur për këtë eksperiencë që e cilëson të padrejtë dhe tronditëse, duke hedhur hije të rënda mbi mënyrën e funksionimit të një prej klubeve më të mëdha në botë.
