Një natë e gjatë dhe dramatike ka vënë në ankth banorët e disa fshatrave në zonën e Finiqit, ku flakët, të përhapura me shpejtësi për shkak të erërave të forta, kanë përfshirë fshatrat Velahovë, Livinë, Ardhasovë, Bistricë dhe Krongj.
Forca të shumta zjarrfikëse nga bashkitë e Finiqit, Delvinës, Konispolit dhe Sarandës, të mbështetura nga pesë mjete zjarrfikëse dhe rreth 70 efektivë të Forcave të Armatosura, kanë ndërhyrë gjatë gjithë natës për të frenuar përhapjen e zjarrit. Për shkak të rrezikut të madh, është kryer evakuimi i banorëve në fshatrat Livinë, Krongj dhe Ardhasovë, ndërsa për të moshuarit janë vendosur ekipe të posaçme për ndihmë mjekësore.
Në fshatin Krongj, zjarri ka shkaktuar dëme të konsiderueshme, duke djegur një banesë dhe kishën e fshatit. Situata më e rëndë paraqitet në Livinë dhe Velahovë, ku dëmet në ullishta dhe kultura të tjera bujqësore janë të mëdha pasi zjarri ka shkrumbuar thuajse gjithçka nëpër këto zona.
Një nga momentet më kritike u shënua në orët e para të mëngjesit, kur një operacion i koordinuar synoi ndalimin e përhapjes së zjarrit drejt Hidrocentralit të Bistricës, duke shmangur një rrezik potencialisht katastrofik.
Autoritetet bëjnë me dije se gjatë ditës pritet edhe ndërhyrja nga ajri për të ndihmuar në shuarjen e plotë të vatrave të mbetura. Hiri i zjarreve është përhapur deri në Sarandë, duke mbuluar makinat dhe verandat e banesave.
Si masë sigurie, është kufizuar qarkullimi në aksin rrugor Muzinë–Bistricë deri në përfundim të operacioneve. Ndërkohë, ekipet në terren po monitorojnë vazhdimisht zonat e djegura për të parandaluar çdo riaktivizim të flakëve, për shkak të kushteve të favorshme për zjarr, erërat e forta dhe temperaturat e larta të parashikuara për ditën e sotme.
