Anemia është një gjendje shëndetësore që ndodh kur trupi nuk prodhon mjaftueshëm qeliza të kuqe të gjakut të shëndetshme, ose kur këto qeliza nuk funksionojnë siç duhet.
Kjo sjell një mungesë të hemoglobinës, përbërësit që transporton oksigjenin nëpër trup dhe ndihmon në largimin e dioksidit të karbonit. Kur këto procese pengohen, organizmi mund të përballet me rreziqe serioze, përfshirë helmimin nga dioksidi i karbonit.
Shkaqet e anemisë janë të shumta dhe shpesh simptomat e saj ngatërrohen me lodhjen e përditshme. Por nëse vini re disa nga shenjat e mëposhtme, është e rëndësishme të konsultoheni me mjekun:
- Zbehja e lëkurës: Një nga shenjat më të zakonshme të anemisë është ndryshimi i ngjyrës së lëkurës, që mund të dallohet jo vetëm në fytyrë, por edhe në pëllëmbë, qepallët e brendshme dhe gjuhë.
- Rrahje të parregullta të zemrës: Mungesa e hemoglobinës e detyron zemrën të punojë më fort për të shpërndarë oksigjenin, duke shkaktuar rrahje të çrregullta.
- Lodhje e vazhdueshme: Pa oksigjen të mjaftueshëm, trupi lodhet më shpejt dhe ka më pak energji për aktivitetet e përditshme.
- Vështirësi në përqendrim: Ashtu si organet e tjera, edhe truri ndikohet nga mungesa e oksigjenit, duke shkaktuar probleme me përqendrimin dhe mendimin e kthjellët.
- Dobësim i thonjve: Thonjtë që hollohen ose marrin formë lugë mund të jenë një tregues i anemisë.
- Çarje në cepat e buzëve: Jo si tharjet e zakonshme, por çarje më të theksuara në këndet e buzëve janë një tjetër simptomë e mundshme.
Nëse keni vërejtur ndonjë nga këto shenja, mos e neglizhoni. Këshillohuni me mjekun për të bërë analizat e nevojshme dhe për të filluar trajtimin në kohë.
