Tiranë – Prej paradites së kësaj të marte, Milena Nikolli, një grua 62-vjeçare nga Kodër Thumana, proteston e vetme para Ministrisë së Infrastrukturës.
Që nga tërmeti i 26 nëntorit 2019, 5 vite më pas, ende nuk ka mundur të marrë paratë për riparimin e banesës së saj private, të dëmtuar. Gruaja në pension jeton aty me vajzën e saj, ndërsa banesa e vlerësuar për tu riparuar në vlerën 34 milionë lekë (të vjetra) degradon edhe më shumë.
Milena Nikollin shumë mund ta mbajnë mend si gruan që protestoi sërish e vetme më 8 mars, ditën që gratë në Shqipëri e kanë keqkuptuar duke festuar.
Milena kaloi natën para bashkisë së Krujës dhe e ndërpreu grevën e saj pasi nga autoritetet vendore në atë kohë iu premtua zgjidhje: se me në fund do të merrte fondin për të riparuar shtëpinë e saj, dhe se procedura do të zgjaste jo më shumë se 2 javë.
Por nga ajo kohë, zonja 62-vjeçare ende nuk ka gjetur zgjidhje, dhe pas sorollatjeve burokratike në bashkinë e Krujës, thotë se përfaqësues lokalë i thanë se fondi është bllokuar nga pushteti qendror.
Milena Nikolli tregon se nga bashkia e Krujës i thanë se teksa ata merreshin me procedurat, zonja të aplikonte për lejen e ndërtimit. Dhe ashtu thotë se bëri: Pagoi ekspert për projektin e riparimit të shtëpisë dhe më 31 korrik të këtij viti mori në dorë lejen e ndërtimit. Por sërish fondi 34 milionë lekë (të vjetra) nuk i kaloi.
Zonja, e cila jeton me pensionin dhe pagesat që i sjellin fëmijët nga emigrimi, thotë se nuk do të ndalë grevën dhe se nuk do të kthehet në Thumanë nëse nuk i kalojnë paratë për të rindërtuar shtëpinë e saj, që sa më shumë koha kalon, aq më shumë shkatërrohet.
