Një incident i rëndë ka ndodhur në qytetin e Durrësit, ku një shtetas i huaj ka raportuar se është sulmuar dhe grabitur nga pesë persona. Në një mesazh drejtuar redaksisë së Top Channel, ai ka përshkruar se sulmi përfshinte goditje me shkopa dhe përdorimin e thikës, duke e përshkruar aktin si një krim të traumatizueshëm dhe të organizuar, që përfshin përpjekje vrasjeje dhe grabitje të rënduar.
Shtetasi, identifikuar si Dirnstorfer SAlexandru Cristian, thekson se pas sulmit, ai ka shkuar në polici për të denoncuar ngjarjen. Megjithatë, ai shprehet se si i huaj, dëgjimi i ankesës së tij nuk është marrë seriozisht nga autoritetet dhe se nuk është bërë asnjë veprim konkret për ndihmën e tij apo ndëshkimin e agresorëve. Ai ndjen se është i pambrojtur dhe se zëri i tij nuk është dëgjuar.
Dirnstorfer kërkon ndihmën e mediave për të bërë publike ngjarjen, në mënyrë që të krijojë një presion ndaj autoriteteve për të marrë masa dhe për të siguruar drejtësi për këtë ngjarje që i ndodhi. Ai shprehet se incidenti ka lënë një ndikim të thellë mbi ndjenjat e tij të sigurisë gjatë qëndrimit në Shqipëri, një vend që ai e kishte zgjedhur për pushime.
Ngjarja sjell në vëmendje çështjen e sigurisë për turistët dhe se si situata e krimit në vende të caktuara mund të ndikojë në perceptimin e sigurisë nga të huajt.
