Shtëpia e Bardhë ka ringjallur teorinë se Covid-19 doli nga një laborator kinez, duke publikuar versionin e ri në një faqe interneti që e paraqet atë si “origjinën e vërtetë” të pandemisë. Këtë e kanë raportuar mediat amerikane.
Faqja e internetit Covid.gov, e fokusuar më parë në promovimin e informacionit rreth vaksinave dhe testimit, tani paraqet një imazh të plotë të Donald Trump dhe kritikon politikat anti-pandemike të ish-presidentit Joe Biden. Sajti synon gjithashtu Anthony Faucin, ish-ekspert i Biden-it për Covid-in, sipas të cilit Covid-19 filloi natyrshëm.
Në faqen e WEB-it janë pesë pika që synojnë forcimin e teorisë së rrjedhjes së laboratorit, duke vënë në dukje se Wuhan, vendi i rastit të parë të njohur të koronavirusit, është gjithashtu shtëpia e “laboratorit kryesor të kërkimit SARS” të Kinës dhe ka një histori kërkimi të kryer me “nivele joadekuate të biosigurisë”.
“Pothuajse me çdo masë shkencore, nëse do të kishte prova të origjinës natyrore, ajo do të ishte shfaqur tashmë. Por nuk ka”, shkruhet në faqe.
Teoria e daljes nga laboratori, e cila dikur u hodh poshtë si një teori konspirative, kohët e fundit ka rifituar popullaritet në Shtetet e Bashkuara, veçanërisht pasi një dokument i kongresit ringjalli hipotezën.
Ndërsa debati mbetet i pazgjidhur, shkencërisht dhe politikisht, agjencitë amerikane si Byroja Federale e Hetimit dhe Departamenti i Energjisë kanë dalë në mbështetje të tezës. Në fillim të këtij viti, CIA ndryshoi qëndrimin e saj zyrtar për origjinën e virusit, duke thënë se kishte “më shumë gjasa” të kishte dalë nga një laborator kinez sesa të ishte transmetuar nga kafshët. Vlerësimi tërhoqi kritika nga Kina, e cila e quajti atë “jashtëzakonisht të pamundur”.
