Një rast tronditës është zbuluar në zonën Skourta të Boiotisë, ku autoritetet greke kanë gjetur një automjet të djegur plotësisht dhe brenda tij një trup të karbonizuar. Viktima dyshohet të jetë Sulo Halili, 27 vjeç, me origjinë nga Tepelena, i cili prej gjashtë ditësh ishte shpallur i zhdukur nga familjarët në Halkidë.
Halili ishte larguar nga banesa pasditen e 4 nëntorit me makinën e tij personale, por nuk ishte kthyer më. Familja humbi kontaktet dhe telefoni rezultonte i fikur. Pas disa ditësh, automjeti u gjend i braktisur në zonën e Villas, në Atikë, duke ngritur dyshimet për një ngjarje kriminale.
Pamjet nga vendngjarja treguan trupin e viktimës të lidhur me hekur dhe me shenja plagosjeje nga armë zjarri. Hetuesit grekë dyshojnë se krimi është kryer disa orë para djegies së automjetit, ndërsa mënyra e ekzekutimit ngre pistat e hakmarrjes ose urrejtjes personale.
Sipas mediave greke, makina ku u gjet trupi rezulton e vjedhur në Glyfada dhe mbante targa të falsifikuara nga një automjet tjetër, çka tregon se autorët kanë vepruar me kujdes dhe kanë tentuar të zhdukin çdo gjurmë.
Autoritetet po presin konfirmimin përfundimtar të ADN-së, megjithatë të gjitha të dhënat çojnë drejt identitetit të 27-vjeçarit shqiptar, i cili ishte shpallur i zhdukur më 9 nëntor në kuadër të “Silver Alert”.
Burime pranë policisë bëjnë të ditur se po hetohen disa pista, përfshirë rrethin shoqëror të viktimës, pasi dyshohet se së fundmi ai kishte hyrë në kontakte të reja që mund të lidhen me vrasjen.
Halili njihej si një person i qetë dhe i respektuar, që jetonte prej vitesh në Greqi me familjen e tij.
Hetimet për zbardhjen e plotë të ngjarjes makabre vijojnë, ndërsa familjarët presin me ankth konkluzionet përfundimtare të autoriteteve.
