Të burgosurit me origjinë shqiptare dhe gjeorgjiane në burgun e Korfuzit protestuan sot kundër kontrolleve të fundit të kryera në qelitë e tyre, gjatë të cilave u sekuestruan disa telefona celularë.
Tensionet kulmuan në orët e para të mëngjesit të së martës, më 20 maj 2025, kur të burgosurit reaguan duke i vënë zjarrin dyshekëve dhe objekteve të tjera në shenjë pakënaqësie ndaj trajtimit të tyre.
Pas ndërhyrjes së zjarrfikësve dhe stafit të sigurisë së burgut, zjarri u vu nën kontroll dhe situata u stabilizua, sipas raportimeve nga mediat lokale greke.
Sipas të njëjtave burime, të dënuarit shqiptarë dhe gjeorgjianë pretendojnë se janë viktima të diskriminimit për shkak të kombësisë së tyre dhe se nuk u garantohen të drejtat bazë të njeriut brenda institucionit penal.
