Një ngjarje e çuditshme ka tronditur qytetin e Valevës në Serbi. Sipas B92, një billboard aty ka publikuar një imazh provokues: një shqiponjë me dy krerë, me plis në kokë, që “kap” për fyti një shqiponjë tjetër, e cila ka flamurin e Serbisë në prapavijë.
Fotografia është shpërndarë në Instagram nga faqja “valjevo_live”, e cila raportoi se “në qendër të qytetit është shfaqur ky billboard, i cili besohet se është hakuar”. Postimi i saj ka shkaktuar mjaft reagime, duke e cilësuar situatën si provokim.
Një individ që pretendon se është pronari i billboardit ka dhënë një përgjigje në komentet e postimit. Ai shkruan: “Jam pronari i billboardit që është hakuar mbrëmë. E fikëm menjëherë sapo e kuptova, dhe rasti do të raportohet tek autoritetet përkatëse.” Megjithatë, ende nuk ka ardhur ndonjë deklaratë zyrtare në lidhje me këtë incident.
Imazhi i shqiponjës me plis ishte bërë virale që nga viti 2014, pas përballjes së njohur mes Serbisë dhe Shqipërisë, duke e shtuar më tej tensionin mes dy vendeve. Kjo ngjarje, e shoqëruar nga simbolika e fortë kombëtare, ka rikthyer diskutimet për identitetin dhe marrëdhëniet mes popujve.
