Partia Popullore Europiane (PPE), veç Libanit dhe Moldavisë, ka vendosur të përfshijë edhe Shqipërinë në axhendën e saj për misione verifikimi. Ky vendim është marrë gjatë Asamblesë Parlamentare, pas kërkesës së kreut të Partisë Demokratike, Sali Berisha.
Ky i fundit, gjatë fjalës së tij, teksa denoncoi “farsën” e zgjedhjeve të 11 Majit, e konsideroi Shqipërinë si të vetmin narko-shtet në Europë dje kërkoi ndihmë nga PPE për dërgimin e një misioni fakt-mbledhës, pasi sipas tij, vendi ynë është një eksportuese e madhe kriminaliteti e droge, dhe një eksportuese shumë e madhe emigrantësh.
Ne ndodhemi në një situatë shumë të vështirë. Kartelat e drogës në vendin tim janë, me diferencë, më të fuqishmet në Europë. Pse? Sepse kanë në dorë portet kryesore të vendit. Rruga e heroinës që vjen nga Lindja kalon nga duart e tyre. Ata janë në sipërmarrje të përbashkëta me policinë, prokurorët, ministrat – dhe vetë Kryeministrin. Në zyrën e tij, ai mban një person të quajtur Ergys Agasi, që vepron si koordinatori i kartelit të drogës në shërbim të pushtetit. Nuk është një situatë e lehtë, por është një situatë që duhet dhe mund ta luftojmë.” – u shpreh Berisha.
Teksa pranoi kërkesën e Berishës, sekretarja e Përgjithshme e PPE-së, Dolors Montserrat, deklaroi se Shqipëria do të jetë një prej prioriteteve.
“Vendosëm të bëjmë dy misione, një në Liban dhe një në Moldavi, por tani do ta vendosim si prioritet edhe Shqipërinë. Mendoj se është një ide e mirë kur na kërkoni diçka, ndaj do ta vendosim si një nga prioritetet dhe objektivat tona që të bëjmë një mision në Shqipëri.” – tha ajo.
