Arrestohet përsëri në Dubai anëtari kryesor i bandës “Reçi” në Rrëshen, Elson Reçi. Ky perzonash i shpallur në kërkim nga drejtësia shqiptare për atentatin e kryer kundër Preng Gjinit, është arrestuar fillimisht më 19 gusht të vitit 2024 në Dubai pas një operacioni të zhvilluar nga autoritetet shqiptare në bashkëpunim me Dubain.
Soni alias Elson Reçi qëndroi për disa ditë në burg dhe më pas u la i lirë më kusht për tu paraqitur përpara autoriteteve. Sipas burimeve për media, bëhet me dije se Reçi është arrestuar përsëri nga policia e Dubait pasi nuk ka zbatuar masën e vendosur “Detyrim paraqitje”.
Reçi kërkohet prej kohësh autoritetet shqiptare për rolin e tij si organizator i vrasjes së Preng Gjinit, një akt që dyshohet se ishte pjesë e një zinxhiri hakmarrjesh për vrasjen e xhaxhait të tij, Kastriot Reçi, një tjetër emër i përfolur në botën e krimit.
Atentati me minë të telekomanduar ndaj Preng Gjinit ndodhi në kryeqytet mbrëmjen e 15 shtatorit 2020. Shpërthimi ndodhi sapo makina u fut në urën e Nisharakut në Tiranë, duke sjellë plagosjen e rëndë të Preng Gjinit. Ai iu nënshtrua një ndërhyrjeje të gjatë kirurgjikale dhe mjaft delikate, për shkak të dëmtimeve të shumta.
400 gram C4 ishte vendosur në pjesën e poshtme të makinës që drejtonte Preng Gjini, nga Rrësheni dhe shpërtheu në momentin kur ai po udhëtonte mbi urën e lumit Lana, që ndodhet te zona e njohur si ish-Stacioni i Fundit i Tiranës së Re.
Shpërthimi ishte aq i fuqishëm sa u ndje në një rreze të gjerë, edhe në zona të Tiranës që ndodhen shumë larg vendit të ngjarjes. Për shkak të këtij shpërthimi u plagosën lehtë edhe dy kalimtarë, një shtetas italian dhe një fëmijë.
