Kandidati për deputet dhe zëdhënësi i koalicionit “Nisma Shqipëria Bëhet”, Ferdinand Dervishi, gjatë pasdites së sotme doli në njl deklaratë për mediat, ku deklaroi se koalicioni ku bën pjesë ka konstatuar disa shkelje në procesin e votimit.
Ai tha se “Nisma Shqipëria Bëhet” ka referuar pranë SPAK-ut dhe Komisionit Qendror të Zgjedhjeve një numër të konsiderueshëm shkeljesh të Kodit Zgjedhor deri në orët e pasdites.
Sipas tij, shkeljet përfshijnë blerje votash, presion ndaj votuesve, patronazhime, si dhe praninë e personave të paautorizuar brenda qendrave të votimit.
Pjesë nga fjala e tij:
“Deri në orët e para të pasdites, “Nisma Shqipëria Bëhet” ka administruar dhe adresuar në Prokurorinë e Posaçme – SPAK, në Komisionin Qendror të Zgjedhjeve, një numër të konsiderueshëm shkeljesh të Kodit Zgjedhor gjatë procesit të votimeve.
Janë raste të blerjes së votës, raste kur persona me karrierë kriminlale kanë intimiduar dhe në një rast kanë ushtruar dhunë ndaj votuesve, disa raste të patronazhistëve që kontrollojnë veprimet e votuesve në qendrat e votimit, dëmtim me kast të fletëve të votimit në kolonën ku votohet “Nisma Shqipëria Bëhet”- shenja që e bëjnë fletën e votimit të pavlefshme, monitorim me kamera të dhomës së fshehtë, futje të njerëzve të paautorizuar në qendra votimesh, e shumë parregullsi të tjera.
I bëjmë thirrje institucioneve përgjegjëse të jenë aktive dhe të paanshme në monitorimin e procesit zgjedhor.”
