Një ngjarje e frikshme ndodhi këtë mbrëmje në Koman, ku dy turistë gjermanë shpëtuan mrekullisht pasi makina e tyre për pak sa nuk ra në ujë nga një lartësi prej rreth 30 metrash. Incidenti ndodhi në aksin rrugor Koman-Vau i Dejës, kur makina doli nga ura dhe mbeti varur mbi një shkëmb.
Banorët e zonës u mobilizuan menjëherë për të ndihmuar turistët, të cilët ishin jashtë rrezikut për jetën. Sipas raportimeve, makina mbeti e varur për disa minuta, duke kërkuar ndërhyrjen e banorëve dhe autoriteteve lokale, të cilët përdorën mjete të ndryshme dhe litarë për të tërhequr dhe shpëtuar turistët.
Policia mbërriti në vendngjarje për të kryer hetime rreth incidentit. Kryetari i fshatit Koman, Frederik Gjoni, shprehu shqetësimin për gjendjen e këtij aks rrugor, duke theksuar se ka shumë ankesa për gropat, mungesën e mbrojtëseve dhe sinjalistikës. “Siç e shikoni, makina është varur dhe poshtë është 30 metra. Për fat të mirë, turistët gjermanë kanë shpëtuar dhe i kemi nxjerrë,” tha ai.
Ky aks është cilësuar si tepër problematik dhe i rrezikshëm për kalimtarët, duke nxjerrë në pah nevojën për përmirësime urgjente në infrastrukturën rrugore.
