Një gjeneral i lartë i ushtrisë ruse humbi jetën mëngjesin e së hënës pas një shpërthimi të fuqishëm në automjetin e tij, në jug të Moskës, bëjnë të ditur autoritetet hetimore ruse.
Viktima është gjeneral-lejtnanti Fanil Sarvarov, drejtues i Drejtorisë së Trajnimit Operativ në Shtabin e Përgjithshëm të Forcave të Armatosura të Rusisë.
Sipas Komitetit Hetimor të Rusisë, shpërthimi ndodhi në një parking pranë një ndërtese banimi.
Sarvarov pësoi plagë të rënda dhe ndërroi jetë si pasojë e tyre. Rrethanat e ngjarjes mbeten ende të paqarta, ndërsa autoritetet kanë hapur një hetim penal.
Zëdhënësja e Komitetit Hetimor, Svetlana Petrenko, deklaroi se hetuesit po ndjekin disa pista hetimi, përfshirë mundësinë që atentati të jetë organizuar nga shërbimet inteligjente ukrainase.
Ajo theksoi se po kryhen ekspertiza të specializuara, përfshirë ekzaminime forenzike dhe analiza të lëndëve shpërthyese, si dhe po merren në pyetje dëshmitarë të shumtë.
Ky nuk është rasti i parë i tillë në kryeqytetin rus që nga nisja e pushtimit të plotë të Ukrainës në vitin 2022.
Në dhjetor 2024, gjeneral-lejtnanti Igor Kirillov u vra nga një mjet shpërthyes i aktivizuar në distancë, ndërsa në prill të këtij viti, gjeneral-lejtnanti Yaroslav Moskalik humbi jetën nga një bombë e vendosur në automjet.
Ukraina nuk ka marrë përgjegjësinë për asnjë nga këto ngjarje.
Vrasja e Sarvarovit pritet të rrisë tensionet dhe shqetësimet për sigurinë në Rusi, ndërsa hetimet vijojnë për të zbardhur autorët dhe motivet e këtij atentati.
