Një shpërthim ka ndodhur mbrëmjen e sotme, më 28 maj, pranë Institucionit të Ekzekutimit të Vendimeve Penale (IEVP) në Fushë-Krujë, duke shkaktuar shqetësim dhe alarm në zonë.
Fillimisht u raportua se zhurma mund të ishte shkaktuar nga një defekt në një gjenerator afër burgut, por hetimet paraprake kanë hedhur poshtë këtë pistë. Burime pranë autoriteteve bëjnë me dije se dyshohet për një sasi të vogël lënde plasëse, e dyshuar si tritol.
Ngjarja është regjistruar rreth orës 22:45, kur një telefonatë alarmoi sallën operative të Drejtorisë Vendore të Policisë Tiranë për një shpërthim brenda perimetrit të sigurisë së burgut. Fatmirësisht, nga shpërthimi nuk ka të lënduar dhe as dëme materiale.
Në vendngjarje kanë mbërritur forcat e Policisë dhe grupi hetimor, ndërkohë që oficerë nga Policia e Tiranës janë dërguar për të asistuar në hetim. Strukturat po punojnë për të përcaktuar llojin e saktë të lëndës shpërthyese dhe për të zbardhur rrethanat dhe motivet e mundshme të kësaj ngjarjeje misterioze.
Policia vijon hetimet për të identifikuar autorët dhe qëllimin e këtij akti, ndërkohë që pritet një reagim zyrtar i mëtejshëm në orët në vijim.
