Pesë vende kanë shprehur gatishmërinë për të dërguar trupa në Gaza, në kuadër të një Forcë Ndërkombëtare Stabilizuese, një iniciativë e presidentit amerikan Donald Trump. Vendet që do të kontribuojnë me trupa janë Indonezia, Maroku, Kazakistani, Shqipëria dhe Kosova. Përveç këtyre, Egjipti dhe Jordania do të ofrojnë mbështetje përmes trajnimit të oficerëve palestinezë të policisë. Misioni do të drejtohet nga gjenerali amerikan Jasper Jeffers, i emëruar nga Bordit i Paqes i Trumpit. Indonezisë i është besuar pozita e zëvendëskomandantit, e cila është konfirmuar nga gjenerali Jeffers.
Presidenti indonezian Prabowo Subianto ka thënë se vendi i tij është i gatshëm të dislokojë deri në 8,000 ushtarë, duke shprehur dëshirën për të kontribuar në procesin e ndërtimit të paqes. Sidoqoftë, ende nuk ka një konfirmim të qartë mbi modalitetet e shpërndarjes së trupave. Një hartë që po qarkullon në rrjetet sociale tregon se forcat nga Shqipëria mund të vendosen në Deir al-Balah, ndërsa ato nga Kosova në veriun e Rripit të Gazës.
Forca stabilizuese pritet që në fazën e parë të ketë deri në 20,000 anëtarë. Donald Trump ka shprehur vazhdimisht optimizëm në lidhje me këtë iniciativë. Para takimit në Washington, ai deklaroi se “udhëheqësit më të mëdhenj në botë” po bashkoheshin me Bordin të Paqes, i cili fillimisht u paraqit si një organ për të ndihmuar përpjekjet e paqes në Gaza. Megjithatë, pas këtyre deklaratave, fushëveprimi i Bordit është zgjeruar në mënyrë drastike, duke u shndërruar në një organ me karakteristika të ngjashme me ato të OKB-së, i cili synon të trajtojë konflikte të mëdha globale.
Kjo nismë vjen në një kohë të ndjeshme për rajonin, duke treguar një angazhim ndërkombëtar për stabilizimin e Gazës, megjithatë e gjithë kjo do të kërkojë një koordinim të mirë midis vendeve pjesëmarrëse dhe një planifikim të kujdesshëm për të siguruar që ky mision të jetë efektiv.
