Disa ditë më parë emisioni “Stop” në Tv Klan tregoi sesi avokatja e Lushnjes Klotilda Kola, kishte mashtruar disa qytetarë, duke u marrë paratë, pa u mbaruar asnjë punë. Në Dhomën e Avokatëve Lushnje, kryetari Kozma Jano, tha se, Klotilda Kola, është pa licencë dhe e pa regjistruar në tatime prej më shumë se 8 vjetësh.
Ajo ka ushtruar profesionin në mënyrë të paligjshme dhe ka mashtruar dhe vjedhur qytetarët, gjatë gjithë kësaj kohe.
Në redaksinë e “Stop” kanë mbërritur të tjera denoncime për zonjën Kola. Ajo ka mashtruar edhe 4 familje të një fisi për nxjerrjen e certifikatave të pronësisë në Lushnjë. Pasi ata kanë bërë pagesat, ajo i ka mbajtur me shpresë, deri në ditën kur mbylli zyrën dhe u zhduk papritur.
Këtë herë në “Stop” është ankuar Armando Boçi, pronari i dyqanit, ku ka punuar Klotilda. Armando thotë se Klotilda ka ikur, duke lënë pa paguar qiranë dhe energjinë.
Kontrata i ka përfunduar në maj, por ajo është zhdukur që në prill bashkë me çelësat e zyrës me vete. Shumë njerëz, të mashtruar prej saj, tentojnë të shqyejnë derën në shenjë proteste.
“Jam pronari i këtij subjekti, të cilin e kam blerë. I kam të dy të rregullt, janë me kontratë të rregullt. Kontratat janë për një vit. Me avokaten Klotilda Kola kam një kontratë që i mbaroi më 31 maj. Avokatja ka ikur që më 17 prill, ka marrë çelësat, ka lënë dosjet këtu dhe unë nuk kam asnjë kontakt. Kam nja dy numra që i bie në telefon dhe më dalin të padisponueshëm gjatë gjithë kohës. Problemi im është që unë dua të më kthehet prona ime mbrapsht, sepse unë kontratën me këtë zonjë e kam mbaruar. Më detyrohet dy muaj për të paguar, kam edhe këtë faturë të energjisë elektrike, që ka shkuar babi e ka paguar sot. Janë muajt, mars, prill, maj, një total prej rreth 50 mijë lekësh të vjetra. Këtu kanë ardhur klientë që tentojnë të thyejnë xhamin dhe mua më shkaktojnë dëm. Kam bërë denoncime pa fund për këtë person në polici”, tha denoncuesi.
“Stop” iu drejtua Policisë së Fierit, e cila tha zyrtarisht, se specialistët për Hetimin e Krimeve të Komisariatit të Policisë Lushnjë, kanë kryer të gjitha veprimet dhe materialet procedurale i kanë referuar në Prokurorinë e Fierit. Ndërkohë Klotilda Kola është shpallur në kërkim dhe po punohet për lokalizimin dhe gjetjen e saj./ TV Klan
