Goli i dytë i Alexander Isak me fanellën e Liverpool-it, i pari i asistuar nga Florian Wirtz, është shndërruar në një tragjedi për sulmuesin suedez. Pas shënimit ndaj portierit Vicario në ndeshjen ndaj Tottenham, Isak ka pësuar një dëmtim të rëndë në kyçin e këmbës së majtë, duke vënë në alarm të gjithë stafin e “Të Kuqve”.
Pesimizmi i Arne Slot Trajneri i Liverpool-it, Arne Slot, u shfaq mjaft i shqetësuar dhe pesimist për gjendjen e sulmuesit pas ndeshjes. “Nuk kam dëgjuar ende asgjë prej tij, por nëse një lojtar shënon gol dhe pastaj dëmtohet e nuk tenton as të kthehet në fushë… zakonisht kjo nuk është shenjë e mirë”. Këto fjalë konfirmojnë frikën se dëmtimi mund të jetë serioz, pasi këmba e Isak mbeti e bllokuar mes fushës dhe trupit të mbrojtësit Van de Ven në momentin e goditjes.
Detajet e dëmtimit dhe koha e rikuperimit Ndonëse Isak u largua nga fusha me këmbët e veta (i shoqëruar nga stafi mjekësor), dhimbjet ishin të dukshme. Testet e para fillestare kanë përjashtuar një thyerje (frakturë) të kockës, por frika më e madhe mbetet te ligamentet e kyçit të këmbës. Sulmuesi do t’u nënshtrohet skanerve më të detajuara sapo të ulet enjtja e këmbës.
Goditje e rëndë për klubin Për blerjen e dekadës te Liverpool, e cila kushtoi plot 125 milionë euro, ky dëmtim pritet të sjellë një mungesë prej disa javësh ose muajsh. Tashmë është pothuajse e sigurt që Isak nuk do të luajë më për vitin 2025. Ky është një lajm i hidhur për tifozët në “Anfield”, veçanërisht në këtë periudhë të ngjeshur të Premier League ku skuadrës i duhen të gjithë lojtarët në dispozicion.
