Një ngjarje tragjike ka ndodhur pasditen e sotme në aksin nacional Korçë – Pogradec, ku një person është gjetur i pajetë pas një aksidenti. Viktima është identifikuar si 40-vjeçari F.P., banues në fshatin Petrushë.
Sipas informacionit të policisë, ngjarja ka ndodhur rreth orës 18:25 në vendin e quajtur “Ura e Leshnicës”. Në bazë të hetimeve të para, dyshohet se F.P. është aksidentuar nga një mjet që më pas është larguar nga vendi i ngjarjes.
Policia ka filluar një operacion për zbardhjen e rrethanave të ngjarjes, duke angazhuar grupin hetimor nën drejtimin e Prokurorisë. Njëkohësisht, shërbimet e Policisë po kontrollojnë serviset dhe ambiente të ndryshme në të gjithë aksin rrugor Korçë – Pogradec, si dhe në fshatrat përreth, për të gjetur automjetin dhe për të arrestuar drejtuesin e tij.
Autoritetet po punojnë intensivisht për të zbuluar detajet e këtij aksidenti dhe për të ndëshkuar ata përgjegjës për humbjen e jetës së F.P.
