Numri i viktimave pas konsumimit të alkoolit të falsifikuar në Ankara ka arritur në 63, ndërsa 36 persona ndodhen aktualisht në kujdes intensiv në spital, sipas raportimeve të gazetës turke Haberler. Hetimi i prokurorit për pijet alkoolike të prodhuara në distileri pa licencë vazhdon.
Prokuroria e Lartë Publike në Ankara ka nisur një hetim dhe deri tani janë arrestuar 30 persona.
Në dosjet e të dyshuarve për kontrabandë alkooli dhe “shkaktim të mundshëm të vdekjes me dashje”, janë përfshirë edhe raportet toksikologjike nga Instituti i Mjekësisë Ligjore. Sipas portalit Milliyet, për shkak të numrit të lartë të viktimave nga helmi i rakisë false, ekspertët kanë theksuar edhe njëherë dëmshmërinë e alkoolit metil, i cili përdoret në prodhimin e alkoolit të falsifikuar.
Mjekët paralajmërojnë se alkooli metil mund të shkaktojë dëme të përhershme dhe serioze shëndetësore, madje mund të jetë fatal.
