Pas një seance të tensionuar, me shumicë votash u miratua propozimi për heqjen nga detyra të kryebashkiakut të Tiranës. Vendimi i dërgohet Këshillit të Ministrave, ndërsa Veliaj paralajmëron apelim në Kushtetuese.
Këshilli Bashkiak i Tiranës ka votuar sot me shumicë propozimin për shkarkimin e kryebashkiakut Erion Veliaj. Seanca u zhvillua mes debatesh të ashpra mes këshilltarëve, ndërsa vendimi u mbështet në nenin 62 të Ligjit për Vetëqeverisjen Vendore, i cili parashikon largimin nga detyra të një kryebashkiaku që mungon për më shumë se tre muaj pa ndërprerje.
Pas miratimit, vendimi do t’i përcillet Këshillit të Ministrave, që ka kompetencën përfundimtare për të dekretuar shkarkimin. Megjithatë, Veliaj ka të drejtë ta ankimojë vendimin në Gjykatën Kushtetuese brenda 15 ditëve, çka do të pezullojë hyrjen në fuqi të procesit deri në një vendim final.
Deri atëherë, drejtimi i Bashkisë do të kalojë përkohësisht te nënkryetari, ndërsa qytetarët e Tiranës përballen me një periudhë të re pasigurie politike dhe institucionale.
Mbështetësit e shkarkimit e konsideruan votën si një hap të domosdoshëm për respektimin e ligjit, ndërsa kundërshtarët e cilësuan vendimin si të nxituar dhe politikisht të motivuar.
