Një incident i rënduar është shënuar mbrëmjen e sotme në qytetin e Fierit, pas një përplasje fizike mes agjentëve të Byrosë Kombëtare të Hetimit (BKH) dhe disa të afërmve të Agron Kapllanajt, ish-kryebashkiak i Mallakastrës dhe bashkëthemelues i partisë “Djathtas 1912” së bashku me Enkelejd Alibeajn.
Ngjarja ka ndodhur rreth orës 19:00, në lagjen “1 Maji”, një zonë e njohur për aktivitet të dendur. Fillimisht u raportua si një konflikt i thjeshtë për vend parkimi, por më pas u zbuluan detaje që e ndërlikojnë më shumë situatën.
Sipas dëshmisë së Kapllanajt, gjithçka nisi kur një makinë e dyshimtë u ndal pranë zyrave të subjektit të tij politik dhe ngriti një dron, veprim që ngriti dyshime tek personat brenda godinës. Roja i objektit u afrua për të kërkuar shpjegime, por sipas Kapllanajt, u përball me fyerje nga një prej individëve në makinë.
“Roja kërkoi sqarim përse po ngrinin dronin në atë zonë, dhe një prej personave i tha se po kërkonin një pronë për të blerë, më pas e fyeu rëndë me fjalë,” është shprehur Kapllanaj.
Pas përplasjes së parë, agjentët u larguan, por u ndoqën nga të afërm të Kapllanajt, gjë që çoi në një konfrontim të dytë. Sipas Kapllanajt, gjatë këtij momenti, agjentët nxorën armët në formë paralajmërimi dhe u prezantuan si pjesëtarë të BKH-së.
Në vendngjarje mbërritën menjëherë forcat e policisë, të cilat ndërhynë për të qetësuar situatën dhe shoqëruan në komisariat dy nipër të Kapllanajt dhe një zyrtar të subjektit politik në fjalë.
Ndërkohë, Agron Kapllanaj ndodhet në ambientet e Policisë së Fierit, ku ka paraqitur një kallëzim penal lidhur me incidentin.
Lexo edhe: Ngritën një dron për të hetuar! Dhunohen policët dhe agjentët e BKH-së në Fier
