Një përplasje me armë zjarri ndodhi pak pas mesditës së sotme në kryeqytetin e Kosovës, Prishtinë, raporton Ilira Neës.
Sipas policisë së Kosovës, të shtënat u regjistruan në rrugën ‘Lidhja e Pejës’ rreth orës 01:20. Nga sherri 4 persona mbetën të lënduar, një prej tyre me armë zjarri ndërsa tre të tjerë nga dhuna me mjete të forta të dyshuara të përdorura në këtë rast.
13 persona janë arrestuar nga Policia për ngjarjen që është cilësuar si vrasje në tentativë, por hetuesit ende nuk kanë zbardhur se cili ka qenë motivi i sherrit.
Njoftimi i policisë:
Sot rreth orës 01:20, policia ka marrë informatën për të shtëna me armë në rrugën “Lidhja e Pejës” në Prishtinë.
Menjëherë pas marrjes së informatës policia ka dalë në vendin e ngjarjes dhe ka ndërmarrë të gjitha veprimet e nevojshme që konsistojnë në hetimin e rrethanave që karakterizojnë ngjarjen.
Bazuar në informacionet e deritanishme raportohet për katër persona të lënduar, njëri prej të cilëve dyshohet të ketë marrë lëndime nga arma e zjarrit ndërsa tre të tjerë kanë pësuar lëndime gjatë përleshjes ku dyshohet të jenë përdorë mjete të forta.
Hetuesit policor në koordinim me prokurorinë, ndërmarrin veprimet hetimore për ndriçimin e plotë të rastit. Deri tani nga ana e policisë janë identifikuar, arrestuar dhe dërguar në mbajtje 13 persona të cilët dyshohet të jenë të përfshirë në këtë rast që është cilësuar si vrasje në tentativë.
