Një tjetër anije luftarake amerikane ka mbërritur në Lindjen e Mesme, sipas të dhënave të gjurmimit detar, ndërsa vijojnë spekulimet se SHBA mund të ndërmarrë sulme të reja ndaj Iranit. – raporton BBC.
Shkatërruesi amerikan i pajisur me raketa të drejtuara USS Delbert D. Black është vërejtur duke kaluar përmes Kanalit të Suezit në drejtim të Gjirit, bëjnë të ditur të dhënat e publikuara nga faqja e gjurmimit MarineTraffic.
Aktualisht, të paktën 10 anije luftarake të SHBA-së besohet se ndodhen në Lindjen e Mesme, përfshirë edhe aeroplanmbajtësen USS Abraham Lincoln.
Një zyrtar amerikan i ka konfirmuar BBC Verify të martën se aeroplanmbajtësja ndodhet në rajon, megjithëse ajo nuk është shfaqur në platformat e gjurmimit për më shumë se një javë.
Megjithatë, në orët e para të mëngjesit të sotëm, BBC Verify ka gjurmuar një avion ushtarak amerikan të tipit Osprey, i cili është parë në Gjirin Persik duke u drejtuar nga Omani. Osprey është një avion transporti me rotor të pjerrët, që mund të ngrihet dhe ulet vertikalisht si helikopter, por fluturon si avion, dhe dihet se operon nga aeroplanmbajtësja USS Abraham Lincoln.
