Lufta në Ukrainë ka hyrë në ditën e 1.366-të, ndërsa një plan i ri paqeje i propozuar nga Shtetet e Bashkuara po ngjall debat në mediat ndërkombëtare.
Sipas burimeve, Uashingtoni i ka paraqitur presidentit Volodymyr Zelensky një draft-marrëveshjeje me 28 pika për t’i dhënë fund konfliktit me Rusinë.
Propozimi përfshin kërkesa të thella kompromisi për Kievin, si dorëzimi i kontrollit të plotë të Donbasit, ngrirja e vijave të frontit në Kherson dhe Zaporizhzhia, si dhe njohja e Krimesë dhe Donbasit si territore ruse.
Në draft përfshihet edhe përgjysmimi i ushtrisë ukrainase dhe njohja e gjuhës ruse si gjuhë zyrtare — kërkesa që konsiderohen të papranueshme nga Kievi.
Mediat ukrainase raportojnë se plani “nuk i shërben interesave të Ukrainës” dhe nuk pritet të merret në shqyrtim në këtë formë.
Në skenën diplomatike, presidenti amerikan Donald Trump ka shprehur gatishmërinë për të ndërmjetësuar mes Kievit dhe Moskës, duke i kërkuar Vladimir Putinit të lejojë një zgjidhje për këtë “luftë të mallkuar”.
Ndërkohë, intensiteti i luftimeve vazhdon. Sulmet ruse në Ternopil kanë shkaktuar të paktën 25 viktima, përfshirë fëmijë.
Paralelisht, tensionet janë rritur edhe jashtë Ukrainës: Britania ka identifikuar një anije spiune ruse, ndërsa Polonia dhe Rumania kanë ngritur avionët luftarakë pas sinjalizimeve të rrezikut. Aeroportet në Varshavë janë mbyllur përkohësisht.
SHBA ka miratuar një paketë të re ndihme ushtarake për Ukrainën, me vlerë 105 milionë dollarë.
Forcat ukrainase raportojnë përdorimin e raketave ATACMS kundër objektivave brenda territorit rus, ndërsa Moska pretendon se ka rrëzuar 65 dronë ukrainas dhe ka goditur një rafineri në Ryazan.
Në këtë kontekst, draft-marrëveshja amerikane shihet si e papranueshme për Ukrainën, për shkak të kërkesave që legjitimojnë territoret e pushtuara nga Rusia.
