Presidenti Donald Trump thotë se SHBA-të kanë kryer një sulm kundër një anijeje që transportonte drogë në jug të Karaibeve, duke vrarë 11 “narkoterroristë”.
Ai bëri me dije në mediat sociale se operacioni ushtarak amerikan i së martës kishte në shënjestër anëtarët e bandës venezueliane Tren de Aragua.
Trump tha se anija ndodhej në ujëra ndërkombëtare dhe po transportonte lëndë narkotike në SHBA.
Duke folur me gazetarët në Zyrën Ovale të martën, Trump tha se forcat amerikane kishin “qëlluar” një “varkë që transportonte drogë” në afërsi të Venezuelës.
“Ka shumë drogë në atë varkë,” tha ai.
Trump shtoi se ishte informuar për incidentin nga kryetari i Shefave të Përbashkët të Shtabit, Gjenerali Dan Caine.
Më vonë, presidenti postoi në platformën e tij Truth Social: “Herët këtë mëngjes, me urdhrin tim, Forcat Ushtarake Amerikane kryen një sulm kundër narkoterroristëve të Tren de Aragua”.
Ai shtoi: “Sulmi rezultoi me vrasjen e 11 terroristëve. Asnjë forcë amerikane nuk u lëndua në këtë sulm. Ju lutem, le të shërbejë ky sulm si njoftim për këdo që mendon të sjellë drogë në Shtetet e Bashkuara të Amerikës. KUJDES!”
Postimi i tij u shoqërua nga një video e paqartë që tregonte një varkë me motor që ecte me shpejtësi nëpër ujëra të trazuara përpara se të shpërthente në flakë.
Në një postim në rrjetet sociale, ministri i komunikimit i Venezuelës, Freddy Ñáñez, sugjeroi, pa prova, se videoja e ndarë nga Trump ishte krijuar me inteligjencë artificiale.
Sekretari i Shtetit Marco Rubio tha në një postim në X se “sot ushtria amerikane kreu një sulm vdekjeprurës në Karaibet jugore kundër një anijeje droge që ishte nisur nga Venezuela”.
Deri më tani është e paqartë se çfarë droge mbante anija.
Që prej kthimit në Shtëpinë e Bardhë në janar, administrata Trump ka cilësuar disa organizata të trafikut të drogës dhe grupe kriminale në Meksikë dhe gjetkë në Amerikën Latine si organizata terroriste.
Midis tyre janë Tren de Aragua dhe një grup tjetër venezuelian, “Karteli i Diejve”, për të cilin autoritetet amerikane pretendojnë se drejtohet nga Presidenti venezulian Maduro dhe zyrtarë të tjerë të lartë qeveritarë.
Ushtria amerikane ka ndërmarrë hapa për të forcuar sigurinë e saj në Karaibet jugore gjatë dy muajve të fundit, duke përfshirë edhe vendosjen e anijeve shtesë detare dhe mijëra marinsave dhe marinarëve amerikanë.
