SHBA ka dërguar pajisje në Danimarkë për t’u përballur me mjetet ajrore pa pilot, përpara samitit të liderëve evropianë që do të mbahet në Kopenhagen midis 1 dhe 2 tetorit, njoftoi Ministria e Mbrojtjes e Kopenhagenit.
Disa vende evropiane i kanë ofruar tashmë mbështetjen e tyre Danimarkës pas fluturimeve të dronëve ditët e fundit. “Jemi të lumtur dhe mirënjohës që SHBA-të po e mbështesin gjithashtu Danimarkën” me pajisje të tilla, tha ministria në një postim në platformën X.
Danimarka e ngriti nivelin e alarmit të sigurisë për impiantet e saj energjetike në portokalli për shkak të rrezikut të sabotimit dhe sulmeve hibride, ndërsa Presidenti ukrainas Volodymyr Zelensky njoftoi se një ekip ushtarak ukrainas është në Danimarkë për të “ndarë përvojën e tij” në përballjen me dronë rusë përmes ushtrimeve të përbashkëta.
“Kemi frikë se përfundimisht dikush do të kërcënojë furnizimin tonë me energji, dhe një vend pa furnizim me energji është një vend që nuk funksionon”, shpjegoi Ministri danez i Energjisë Lars Aaggard për TV2, duke sqaruar se rritja e nivelit të alarmit do të përkthehet në mbikëqyrje më të madhe të objekteve energjetike dhe kufizime në akses.
Danimarka kohët e fundit ka qenë viktimë e një sulmi hibrid me fluturime të përsëritura mbi aeroportet e saj – veçanërisht Aeroporti i Kopenhagenit, më i madhi në Evropën Veriore, u mbyll për shumë orë – dhe mbi instalime ushtarake nga dronë të paidentifikuar.
Kopenhageni pretendon se këto janë dronë rusë dhe kryeministrja Mette Frederiksen deklaroi se “kryesisht ekziston një vend që përfaqëson një kërcënim për sigurinë e Evropës dhe ai është Rusia”.
Për të garantuar sigurinë e samitit evropian që do të mbahet nesër dhe të enjten në Kopenhagen, qeveria daneze ka ndaluar fluturimet civile me dronë deri më 3 tetor.
Herën e fundit që Danimarka rriti nivelin e sigurisë për objektet e saj energjetike ishte në shtator 2022, pas sabotimit kundër tubacionit Nord Stream në Baltik.
