Mijëra persona u mblodhën në Novi Sad, ku studentët universitarë, të cilët prej më shumë se një viti udhëheqin protesta masive, u zotuan se do të vazhdojnë luftën kundër korrupsionit gjatë qeverisjes së presidentit Aleksandar Vuçiç.
Protestuesit brohoritën “hajdutë”, duke akuzuar qeverinë për korrupsion të shfrenuar. Studentët deklaruan se kanë hartuar një plan për rikthimin e sundimit të ligjit, që përfshin ndalimin e zyrtarëve të korruptuar nga politika dhe hetimin e pasurive të tyre. Tubimi u zhvillua nën moton “Çfarë do të thotë fitorja”.
Organizatorët njoftuan se protesta e radhës do të mbahet më 27 janar në Beograd. Studentët thanë gjithashtu se muajin e kaluar kanë mbledhur rreth 400 mijë firma në mbështetje të kandidimit të tyre në zgjedhje.
Protestat kanë nisur në nëntor 2024, pas shembjes së çatisë së stacionit të trenit në Novi Sad, ku humbën jetën 16 persona – një ngjarje që u shndërrua në simbol të korrupsionit të rrënjosur. Trembëdhjetë persona, përfshirë ish-ministrin e Ndërtimit Goran Vesic, u akuzuan në një çështje penale, por Gjykata e Lartë e Novi Sadit hodhi poshtë akuzat ndaj tij muajin e kaluar për mungesë provash. Paralelisht vijon një hetim antikorrupsion dhe një tjetër i mbështetur nga Bashkimi Evropian për keqpërdorim të mundshëm të fondeve.
Protestat pas tragjedisë çuan në dorëheqjen e kryeministrit, rrëzimin e qeverisë dhe formimin e një kabineti të ri, por Vuçiç ka mbetur në detyrë dhe ka refuzuar thirrjen për zgjedhje të parakohshme. Presidenti ka mohuar akuzat për korrupsion, duke i quajtur protestat të nxitura nga jashtë, ndërsa studentët dhe mbështetësit e tyre raportojnë ndalime, presione dhe humbje vendesh pune.
