Pjesët e para të javës së fundit në Serie A kanë përfunduar, dhe drama është në kulm. Napoli ka marrë kryesimin ndaj Cagliarit me një perlë të vërtetë nga Scott McTominay, i cili realizoi me roveshatë, një gol që mund të vlejë një titull kampion. Me këtë rezultat, napolitanët ngjiten në kuotën e 82 pikëve, duke mbajtur fronin përpara Interit.
Në anën tjetër, Interi është në avantazh ndaj Comos, por ndeshja ka marrë një kthesë të madhe. Portieri veteran Pepe Reina u ndëshkua me karton të kuq, duke e lënë Comon me 10 lojtarë që në pjesën e parë. Zikaltërit janë me një këmbë përpara, por për të shpresuar te titulli, duhet që Napoli të ndalet.
Tensioni është maksimal. Me vetëm një pikë diferencë dhe 45 minuta lojë përpara, fati i sezonit është ende i pasigurt. Çdo aksion, çdo gabim, çdo gol mund të ndryshojë krejt historinë e këtij kampionati.
