Misioni i OSBE-së në Kosovë ka thënë se është në dijeni të raportimeve mediatike lidhur me ndalimin e një anëtari të këtij misioni, Jelena Gjukanoviq.
Gjykata Themelore e Prishtinës të dielën ka miratuar kërkesën e Prokurorisë Speciale të Kosovës (PSRK), duke i caktuar një muaj paraburgim, Gjukanoviqit, e dyshuar për spiunazh.
Në një deklaratë për media, Misioni ka bërë të ditur se është në kontakt me përfaqësuesin ligjor të personit të ndaluar dhe po monitoron nga afër mirëqenien e tij, në përputhje me detyrën e kujdesit.
“Përderisa Misioni nuk mund të komentojë më tej për këtë rast për shkak të hetimeve në vazhdim, ai mbetet i përkushtuar për të bashkëpunuar me autoritetet përkatëse,” thuhet në deklaratë.
Gjithashtu, Misioni ka bërë të ditur se është në kontakt me institucionet përkatëse dhe Sekretariatin e OSBE-së në Vjenë për të siguruar respektimin e procesit të duhur ligjor.
Gjukanoviq u arrestua më 28 shkurt, në rajonin e Mitrovicës nën dyshimin për spiunazh, e cila u ndalua për 48 orë nga prokuroria.
Prokuroria kishte njoftuar se arrestimi është bërë pas hetimeve disamujore.
