Finalizohet operacioni policor i koduar “Fortesa”, gjatë të cilit u sekuestruan pasuri me vlerë 26.5 milionë euro në pronësi të një 45-vjeçari, i dënuar për vrasje dhe pjesëmarrje në grup kriminal për trafikim të lëndëve narkotike nga autoritetet italiane.
Specialistët e Seksionit për Hetimin e Pastrimit të Parave, në bashkëpunim me Agjencinë e Administrimit të Pasurive të Sekuestruara dhe të Konfiskuara, ekzekutuan vendimin e Gjykatës së Tiranës, në kuadër të një procedimi penal të drejtuar nga Prokuroria e Tiranës. Objekt i sekuestrimit u bënë pasuritë në pronësi të shtetasit Kristian Koni, alias O. M., 45 vjeç, i dënuar më parë për veprat penale “Vrasja me paramendim” dhe “Trafikimi i lëndëve narkotike” në kuadër të një grupi të strukturuar kriminal.
Pasuritë e sekuestruara përfshijnë 19 prona, 2 automjete dhe 20 llogari bankare, të regjistruara në emër të tij ose të familjarëve, me një vlerë tregu prej rreth 26.5 milionë euro.
Vijon puna për gjurmimin dhe sekuestrimin e pasurive të tjera që dyshohet se kanë burim nga aktivitetet kriminale të këtij shtetasi. Materialet procedurale janë referuar Prokurorisë së Tiranës për veprime të mëtejshme.
