Dhjetëra shishe verë luksoze pa pullë fiskale, me një vlerë të përllogaritur rreth 3 milionë euro, janë sekuestruar në banesën e biznesmenit Ergys Agasi, i shpallur në kërkim si pjesë e një grupi kriminal që dyshohet se rrëmbente biznesmenë dhe, përmes dhunës, i detyronte ata të hiqnin dorë nga tenderat e AKSHIT.
Burime hetimore bëjnë me dije se verërat janë konstatuar nga agjentët e Byrosë Kombëtare të Hetimit (BKH), të cilët kanë njoftuar prokurorin e çështjes. Me urdhër të tij, është vendosur sekuestrimi i menjëhershëm dhe është informuar Drejtoria e Hetimit Tatimor, e cila ka proceduar me bllokimin e shisheve për shkak të mungesës së pullës fiskale dhe dyshimeve për shmangie të detyrimeve tatimore.
Sipas burimeve, një shishe verë kushtonte nga 7 deri në 10 mijë euro dhe bëhej fjalë për verëra të vjetruara nga 70 deri në 100 vjet. Gjatë veprimeve hetimore, është konstatuar edhe një tentativë për ndërrimin e shisheve, por kjo është bërë e pamundur pasi koleksioni ishte fotografuar dhe dokumentuar më herët në mënyrë të detajuar nga grupi i hetimit.
Koleksioni i verërave do t’i nënshtrohet verifikimeve të mëtejshme për të përcaktuar burimin e ligjshëm të pasurisë dhe lidhjen e mundshme me aktivitetin e dyshuar kriminal.
Ndërkohë, Ergys Agasi dhe Ermal Beqiri, ndaj të cilëve Gjykata ka caktuar masën e sigurisë “arrest me burg”, vijojnë të jenë në kërkim, pasi ende nuk është bërë e mundur kapja e tyre nga autoritetet.
Në të njëjtin procedim penal, Gjykata e Posaçme ka lënë sot në fuqi masën e arrestit në shtëpi për drejtoreshën dhe zv/drejtoreshën e AKSHIT. Vendimi është marrë pas shqyrtimit të kërkesave për ndryshim mase, ndërsa hetimet e SPAK vijojnë për zbardhjen e plotë të skemës së dyshuar të manipulimit të tenderave.
