Një moment i pazakontë gjatë prezantimit të politikës së re shëndetësore nga presidenti Donald Trump në Zyrën Ovale riktheu kujtimet nga periudha e Covid-19, përmes një shakaje të drejtuar ndaj Sekretarit të Shëndetësisë, Robert F. Kennedy Jr. dhe drejtorit ekzekutiv të Pfizer, Albert Bourla.
Gjatë fjalimit të tij, Donald Trump shpalli nisjen e TrumpRx, një platformë e re online që do t’u lejojë amerikanëve të blejnë ilaçe me recetë direkt, pa ndërmjetësimin e sigurimeve shëndetësore, dhe me çmime të reduktuara ndjeshëm, deri në 50% më lirë se çmimet aktuale.
Teksa Donald Trump po fliste, Kennedy Jr. që ndodhej vetëm një metër larg presidentit amerikan teshtiu, duke sjell edhe një reagim me nota humori.
“Shëndet, Bobby. Shpresoj të mos kem marrë Covid,” tha Trump, duke shkaktuar të qeshura mes të pranishmëve.
Më pas, ai iu drejtua me shaka Albert Bourla-s, CEO-së së Pfizer që ndodhej pranë tij.
“S’ke ndonjë Paxlovid aty? Ai ka Paxlovid. Ma sill menjëherë një”, tha Trump, duke iu referuar ilaçit antiviral të Pfizer që përdoret për trajtimin e rasteve me Covid-19 në persona me risk të lartë.
