Parlamenti i dalë në zgjedhjet vitit 2021 do të rinisë ditën e nesërme punimet ku do të qendrojë në detyrë deri në 9 shtator, pasi deputetët e rinj të marrin mandatet.
Një ditë para mbledhjes së radhës kreu i grupit palamentar demokrat, Gazment Bardhi, ju ka dërguar një mesazh deputetëve të PD, ku i fton që të marrin pjesë të gjithë në mënyrë që të denoncojnë farsën elektorale të zgjedhjeve të 11 majit.
“Të nderuar kolegë! Nesër ora 12:00 është seanca plenare e Kuvendit, në të cilën do të marrim pjesë dhe do të bejmë gjithçka për të paraqitur faktet e plota për farsën elektorale të 11 Majit. Ju përshëndes!”, shkruan Bardhi në mesazhin drejtuar deputetëve të legjislacionit 2021-2025 të PD.
Kujtojmë që seanca e ditës së nesërme do të jetë kryesisht ceremoniale dhe do të miratohet vetëm kalendari i ligjeve mbi bazën e të cilit do të punojnë deputetët në 3 javët e ardhshme.
Por për shumicën e deputetëve aktualë këto janë seancat e fundit në parlament. 83 deputetë të kësaj legjislature nuk do të ulen më në seancë plenare në muajin shtator kur të nisë punën parlamenti i dalë nga zgjedhjet e 11 majit.
Ndryshimi më i fortë ka ndodhur në grupin parlamentar të PS, nga i cili 45 deputetë nuk do të jenë më pjesë e parlamentit.
Mes tyre edhe Pandeli Majko i cili është i vetmi deputet në Partinë Socialiste që ishte në kuvend prej vitit 1992.
PD nga ana tjetër vazhdon të ketë politikanë që janë zgjedhur që në vitin 1991 në parlamentin e dalë nga zgjedhjet e para pluraliste, kryetarin Sali Berisha e Tritan Shehun.
