Gjykata e Lartë ka rrëzuar kërkesën e Ervin Salianjit për pezullimin e dënimit të tij me burg, të vendosur nga Gjykata e Apelit. Seanca u zhvillua në dhomë këshillimi, pa praninë e palëve, nga një Kolegj Penal me relator Sokol Binajn, dhe anëtarët Sandër Simonin e Ilir Panda.
Salianji kishte kërkuar në Gjykatën e Lartë që dënimi të pezullohej për tre muaj, duke u mbështetur në faktin se ai është dënuar me një vendim të formës së prerë si deputet i Kuvendit, për një denoncim publik të bërë në vitin 2018.
Ish-deputeti theksoi se zbatimi i këtij vendimi do t’i sillte pasoja të rënda, përveç humbjes së mandatit, edhe një pengesë për të kandiduar në zgjedhjet e vitit 2025. Ai kishte depozituar të njëjtën kërkesë edhe në Gjykatën e Tiranës.
Salianji u dërgua në burgun e Fierit një javë më parë, për të përmbushur vendimin e Apelit, i cili konfirmoi dënimin me 1 vit burg për akuzën e “kallëzimit të rremë”, në bashkëpunim, në dosjen “Babalja”.
