Kryetari i Partisë Demokratike, Sali Berisha gjatë një takimi me ish të përndjekurit politik tha se Ervin Salianji dhe Ilir Meta janë dy të burgosur si në kohën e diktaturës staliniste.
Në fjalën e tij, ish kryeministri u kërkoi ish të përndjekurve që të hartojnë një program dhe Partia Demokratike do ta zbatojë.
Berisha u shpreh se nuk mund të ketë paqe sociale pa dëmshpërblyer të përndjekurit politikë dhe pronarët.
“Problemi juaj, pa diskutim janë një seri masash që janë ndërmarrë, por dimensionet e plota, vetëm tani mund të jenë njohur plotësisht me dokumentacione, me histori dhe me çdo gjë. Ndaj dhe ju do përgatisni një program të ri, unë kam besim të plotë se ju do keni vlerësimet më objektive në parashtrimet tuaja dhe PD do ta ketë atë pjesë të programit qeverisës.
Edhe njëherë, nuk mund të ketë paqe sociale, nuk mund të ketë shoqëri të drejtë, pa dëmshpërblyer të përndjekurit politikë dhe pronarët. E dyta, ju jeni një shtresë që vuajtët dhe rezistuat në një diktaturë, por vendi de facto ka rënë në një diktaturë tjetër sot, jo si ajo që përjetuat ju dhe përjetoi Shqipëria. Por sot ka një diktaturë, ku njëlloj si në të parën, të gjitha pushtetet janë në duart e një njeriu. Sot, ka një diktaturë në të cilën huazohen metoda të diktaturës tjetër, që kaluam.
Sot, një deputet, djalë i ri, vetëm pse guxoi të përballet me dy klanet më të rrezikshme mafioze të vendit, klanin Rama dhe klanin Xhafaj, ai festoi ditëlindjen pardje në burgun e Fierit, Ervin Salianji. Pse denoncoi në parlament trafiqet që bënte Gerond Xhafa.
Dhe po të mos e denonconte, ai nuk do përfaqësonte qytetarët shqiptarë. I bëri detyrën dhe sot është në burg. Kryetari i një partie tjetër është në burg Ilir Meta. Pasi e zvarritën në mes të rrugës dhe e goditën si person nën hetim, pa akuzë. Kështu vepronte vetëm diktatura staliniste. Edhe ajo ndiqte disa rregulla, kurse ky nuk ndjek asnjë rregull”, tha nder te tjera Berisha.
