Kreu i Partisë Demokratike, Sali Berisha, është paraqitur sot në ambientet e SPAK, në zbatim të masës së sigurisë “detyrim paraqitje”, e caktuar më herët nga Gjykata.
Berisha akuzohet se gjatë kohës kur mbante postin e kryeministrit ka ndërmarrë veprime konkrete për miratimin e ligjeve dhe akteve nënligjore, ku ka përfituar dhëndri i tij, Jamarbër Malltezi, lidhur me ndërtimin e pallateve në truallin e ish-kompleksit sportiv Partizani.
Gjithashtu edhe Malltezi po përballet me akuza për korrupsion dhe pastrim parash. SPAK ka deklaruar se ai ka përfituar në mënyrë të paligjshme rreth 5.4 milionë euro përmes një projekti ndërtimi, të cilat lidhen gjatë asaj kohe që vjerri i tij ishte në krye të qeverisë.
