Kryetari i Partisë Demokratike, Sali Berisha, në një deklaratë për mediat ka shtrirë dorën e bashkëpunimit drejt forcave të tjera opozitare, duke theksuar nevojën për krijimin e një fronti të gjerë opozitar.
Ai bëri të ditur se në protestën e radhës do të ftohen të gjitha partitë politike opozitare, përfshirë Partinë Mundësia të Agron Shehajt, Shqipëria Bëhet të Adriatik Lapajt dhe Lëvizjen Bashkë të Arlind Qorrit.
Berisha u shpreh se forcat opozitare duhet të qëndrojnë bashkë me qëllim për të rrëzuar “narkoshtetin”, ashtu si dhe ai i referohet qeverisë së Edi Ramës.
Sa i përket datës së protestës së radhës, ai sqaroi se ajo do të përcaktohet pas konsultimeve që nisin menjëherë, duke lënë të hapur mundësinë që protesta të zhvillohet përpara datës 20 shkurt.
“Do ftojmë të gjitha partitë. Është koha të krijojmë një front të gjerë opozitës që forcat opozitare politike të qendrojnë në lartësinë e kërkesës së kësaj kohe dhe t’i japin goditjen e fundit narko-regjimit.
Data e radhës do të përcaktohet por ka shumë mundësi që të mbahet para datës 20 shkurt. Konsultimet nisin sot. Ne nuk heqim dorë, strategjia jonë është protesta”, tha ai.
Pjesë nga fjala e Berishës:
Nuk besoj se flamujt mund të jenë pengesë për bashkimin. Ne nuk kemi asnjë pretendim që partia Mundësia të mos vijë në protestë me flamurin e vet. Të gjitha partitë të vijnë me simbolet e tyre.
Çfarë ka rëndësi themelore, them unë. Ka rëndësi vërtetësia si opozitë e vërtetë.
Unë mund të them se, flamujtë e partive ku përveç tyre do të ketë dhe jashtë spektrit të këtyre flamujve. Janë një frymëzim dhe jo një pengesë, sepse flamuri i partisë Mundësia, frymëzon të gjithë ata që e mbështetën atë parti dhe tani e çojnë përpjekjet e saj të drejta, të ndershme për ndryshimin.
Po kështu flamuri i PD-së. Tani të themi të vërtetën, nuk është se nuk do të dënonim të shihnim derdhjen pa flamuj të qytetarëve, por kjo nuk po ndodh.
Sepse, të jemi realist, në tërësi kjo është kjo është e rrallë, pavarësisht se çfarë thuhet, janë forcat politike ata që mobilizojnë dhe organizojnë protestat.
Ka pasur dhe ndodh. Për shembull ndodhi me armët kimike, por ajo ishte një situatë shumë e mprehtë, akute, të cilën adoleshentët kryesisht e konceptuan atë një rrezik direkt për jetën e tyre dhe dolën, bravo u qoftë, shkruan një kapitull të mrekullueshëm në historinë e protestave.
Por nuk besoj se kjo është një problem, e rëndësishme është që ne të bashkërendojmë, bisedojmë dhe të gjejmë rrugë më të mira për ti dhënë përgjigje narkoshtetit.
