Opozita do të zhvillojë këtë të hënë, në orën 17:00, protestën e radhës. Demokratët do të mblidhen sërish në Tiranë pasditen e sotme për të protestuar dhe kërkuar rrëzimin e qeverisë Rama.
Për herë të parë pas gati një vit mungese, mes protestuesve do të jetë edhe kryetari i Partisë Demokratike, Sali Berisha, i cili prej 27 nëntorit rifitoi lirinë pasi GjKKO i revokoi masën e sigurisë “arrest në shtëpi”.
Siç dhe u bë me dije më herët rrugët që do të bllokohen janë: Rruga pranë Bashkisë së Tiranës, rreth-rrotullimi tek “Zogu i Zi”, tek sheshi “Wilson”, tek “Pallati me Shigjeta”, si dhe kryqëzimi tek “Rruga e Elbasanit”, pranë xhamisë së “Namazgjasë”.
Organizatorët e protestës kanë njoftuar Policinë e Tiranës se do të bllokojnë disa akse për rreth 3 orë. Ndërkohë, policia u ka kthyer përgjigje duke i thënë se do të garantojnë çdo tubim paqësor, mirëpo jo bllokimin e rrugëve dhe se çdo akt i tillë përbën përgjegjësi penale.
Në përgjigjen e kthyer PD, Policia tha se në bazë të ligjit “Për Tubimet”, organizimi i tubimeve në disa segmente rrugore në bashkinë Tiranë krijon probleme dhe premisa për cenime të rendit publik dhe sigurisë së shtetasve të tjerë, pengon qarkullimin e automjeteve të emergjencës, cenon të drejtat dhe liritë themelore për lëvizjen e lirë të shtetasve, si dhe pengon lëvizjen e lirë të automjeteve të transportit publik dhe privat në kryeqytet.
Ndërkohë, ditën e djeshme lideri i demokratëve, Sali Berisha u bëri thirrje shqiptarëve që t’i bashkohen protestës të kësaj të hëne.
Berisha tha se dita e sotme, është dita e betejës, prandaj të gjithë shqiptarët duhet të vijnë në Tiranë me qëllim për të “tundur themelet e narkoshtetit”.
“Nesër, në orën 17:00 është dita e betejës sonë, të gjithë sa janë qytetarët e Tiranës dhe të mbarë Shqipërisë vërshojnë në Tiranë në mosbindje civile për të dridhur themelet e narkoshtetit, narkodiktaturës dhe për të ecur, për ta festuar vitin e ri të sigurt, në fitoren që meritojnë”, tha Berisha ditën e djeshme, gjatë takimit me demokratët.
Kujtojmë se protesta e fundit e demokratëve u mbajt në 26 nëntor, ku protestuesit u shpërndanë në disa zona të kryeqytetit ku dhe bllokuan disa nga nyjet kryesore.
