Rusia ka lënë të hapur mundësinë për t’i ofruar azil politik Elon Musk, pas përplasjes së ashpër që miliarderi pati me presidentin e SHBA-së, Donald Trump.
Dy figurat, që ishin konsideruar si aleatë të fortë që nga zgjedhjet presidenciale të vitit 2024, u përfshinë në një debat publik të tensionuar, pas kritikave të Muskut ndaj projektligjit të ri të Trump për taksat dhe shpenzimet. Miliarderi e quajti këtë iniciativë si një rrezik për borxhin kombëtar, duke e shtyrë presidentin amerikan të shprehej publikisht se ishte “i zhgënjyer”.
Në këtë situatë, Dmitry Novikov, zyrtar i lartë rus dhe nënkryetar i Komitetit për Çështjet Ndërkombëtare, deklaroi për agjencinë TASS se Rusia mund t’i ofronte azil Musk-ut nëse do t’i duhej. “Nëse ai ka nevojë për azil politik, sigurisht që mund t’ia ofrojmë,” u shpreh Novikov. Gjithsesi, ai shtoi se beson se Musk “po luan një lojë krejtësisht tjetër” dhe nuk ka arsye reale për të kërkuar strehim politik.
Nga ana tjetër, Kremlini zyrtar u tregua më i rezervuar. Zëdhënësi Dmitry Peskov nuk pranoi të japë qëndrim mbi mosmarrëveshjen, duke e cilësuar si një çështje të brendshme amerikane.
Kujtojmë se Rusia ka dhënë më parë azil për figura si Edward Snowden dhe blogeri britanik pro-Kremlin, Graham Phillips.
