Paniku ka përfshirë sërish Rumaninë, e cila ka aktivizuar menjëherë avionët luftarakë pas njoftimeve për dy dronë që shkelën hapësirën e saj ajrore. Ngjarja ndodhi pranë kufirit me Ukrainën, një vend që ndodhet nën agresionin rus. Në përgjigje, Rumunët aktivizuan dy F-16 dhe dy Eurofighter, pjesë e misionit të policisë ajrore të Gjermanisë, duke shënuar kështu një tjetër incident të rëndësishëm të sigurisë.
Kjo është hera e dytë që avionët luftarakë ngrihen në ajër në Rumani nga fillimi i shtatorit, pas një incidenti më 13 shtator kur një dron kaloi në hapësirën ajrore të saj gjatë një sulmi rus ndaj infrastrukturës ukrainase. Shtimi i ndërhyrjeve me dronë rusë në hapësirën ajrore të vendeve evropiane anëtare të NATO-s ka krijuar shqetësime të mëdha, me kryetaren e Komisionit Europian, Ursula Von der Leyen, që e ka cilësuar këtë situatë si një “luftë hibride”.
Vende si Belgjika, Gjermania, Republika Çeke, Spanja, Norvegjia dhe Danimarka gjithashtu kanë raportuar për shkelje të hapësirës ajrore nga dronët rusë. Vetëm gjatë natës së 9 shtatorit, rreth 20 dronë rusë hynë në qiellin e Polonisë, ndërsa më 19 shtator, tre aeroplanë ushtarakë rusë shkelën hapësirën ajrore të Estonisë për 12 minuta para se avionët luftarakë italianë t’i shoqëronin jashtë saj. Dhe më 23 tetor, Lituania njoftoi për hyrjen e dy avionëve luftarakë rusë në hapësirën e saj ajrore.
Këto incidente vënë në dukje rritjen e tensioneve dhe rrezikun për sigurinë në të gjithë Evropën, duke theksuar nevojën për vigjilencë dhe një përgjigje të koordinuar nga vendet anëtare të NATO-s. Situata është bërë edhe më e ndërlikuar nga lufta në Ukrainë, e cila vazhdon të krijojë sfida të reja për stabilitetin rajonal.
