Sekretari i Shtetit i SHBA-së, Marco Rubio, përshëndeti sot nga Roma marrëveshjen e shkëmbimit të të burgosurve të arritur në Stamboll mes Ukrainës dhe Rusisë, duke theksuar “thirrjen e Presidentit Donald Trump për një armëpushim të menjëhershëm”, sipas zëdhënëses së tij.
“Shtetet e Bashkuara duan të arrijnë një fund të qëndrueshëm të luftës midis Rusisë dhe Ukrainës”, sipas “mesazhit të fortë të Presidentit Trump”, tha Tammy Bruce, zëdhënësja e Rubio, e cila ndodhet në Romë për të marrë pjesë në meshën inauguruese të Papa Leo XIV nesër, të dielën, në Bazilikën e Shën Pjetrit.
“Plani i paqes i propozuar nga Shtetet e Bashkuara përcakton mënyrën më të mirë për të bërë përparim”, theksoi ajo, duke konfirmuar se më herët sot u zhvillua një bisedë telefonike midis Rubios dhe homologut të tij rus Sergei Lavrov, e cila ishte njoftuar më parë nga Ministria e Jashtme ruse.
Donald Trump tha sot se do të flasë në telefon të hënën me homologun e tij rus Vladimir Putin rreth konfliktit në Ukrainë, përpara se të flasë me Presidentin ukrainas Volodymyr Zelensky dhe disa udhëheqës të shteteve anëtare të NATO-s.
“Temat e telefonatës do të jenë: ndalimi i ‘gjakderdhjes’”, shkroi ai në platformën Truth Social, një ditë pas bisedimeve të drejtpërdrejta të paqes ruso-ukrainase, të parat që nga viti 2022.
Trump sqaroi se shpreson për “një ditë produktive, që të arrihet një armëpushim dhe që kjo luftë shumë e dhunshme, një luftë që nuk duhej të kishte ndodhur kurrë, të përfundojë”.
Të premten në Stamboll, delegacioni ukrainas u kishte kërkuar kryesisht rusëve një armëpushim “pa kushte” dhe një takim midis presidentëve të dy vendeve të tyre.
Ajo siguroi vetëm shkëmbimin e 1,000 të burgosurve nga secila palë, siç konfirmuan negociatorët rusë. Sot, kreu i shërbimeve të inteligjencës ushtarake ukrainase (GUR) Kirill Budanov tha se “shpreson” që ky shkëmbim të ndodhë “javën tjetër”.
